تاريحى مىڭجىلدىقتارمەن ساباقتاسىپ جاتقان اۋليەاتا ءوڭىرىنىڭ اقپارات ايدىنى جاڭا جۋرنالمەن تولىقتى. رەسپۋبليكا كولەمىندە تارايتىن جاڭا جۋرنالدىڭ تانىستىرىلىمىنا پرەزيدەنت كەڭەسشىسى مالىك وتارباەۆ, جەرگىلىكتى زيالى قاۋىم وكىلدەرى قاتىسىپ, تاريحي, ادەبي, عىلىمي باعىتتاردا قالام سىلتەيتىن رەداكتسيا ۇجىمىنىڭ جۇمىسىنا ساتتىلىك تىلەدى, دەپ حابارلايدى Egemen.kz.
«تاريحى مىڭجىلدىقتارمەن استاسىپ جاتقان تاراز جەرىندە جارىق كورگەن جاڭا جۋرنالدىڭ ءوز ميسسياسى بار. ەڭ باستىسى – بابالار اماناتىنا ادال بولۋ كەرەك. ۇلت تاريحى, ادەبيەت پەن مادەنيەتتىڭ, عىلىمنىڭ جارشىسىنا اينالاتىن جۋرنالدىڭ ساپالى شىعۋىن رەداكتسيا ۇجىمى قاپەردەن شىعارمايدى دەگەن سەنىم زور. «Tekturmas» - ءوڭىردىڭ رۋحاني كەڭىستىگىن كەڭەيتىپ, تالانتىمەن تانىلعان قالامگەرلەر مەن جاس زەرتتەۋشىلەردىڭ جاڭاشىل قادامىنا جول اشاتىن مىنبەر», دەدى ءوڭىر باسشىسىنىڭ ورىنباسارى سەرىك سالەموۆ جۋرنالدىڭ تانىستىرىلىمىندا سويلەگەن سوزىندە.
«Tekturmas» جۋرنالىنىڭ باعىت-باعدارى تۋرالى ءسوز قوزعاعان «Aulieata media» جشس باس ديرەكتورى دانيار اسقار ۇلىنىڭ ايتۋىنشا, الداعى ۋاقىتتا جاڭا باسىلىمنىڭ تارالىمىن ارتتىرۋ بويىنشا جان-جاقتى جۇمىس جۇرگىزىلمەك.
ءىس-شارا بارىسىندا ءسوز العان بەلگىلى قالامگەر پەرنەباي دۇيسەنبين جامبىل ءوڭىرىنىڭ تىلسىمعا تولى تاريحى ءالى تالاي جىلدار بويى زەردەلەنەتىنىن اتاپ ءوتىپ, جاڭا جۋرنال ۇجىمى تاريح پەن ادەبيەتتى, مادەنيەت جانە عىلىم تاقىرىبىن تەرەڭنەن قاۋزاۋعا دەن قويعانى ابزال ەكەنىن تىلگە تيەك ەتتى.
«سوڭعى جىلدارى ءوڭىر رۋحانياتىنا ايرىقشا كوڭىل ءبولىنىپ جاتىر. وبلىس باسشىسىنىڭ ىقپالىمەن قالامگەرلەرگە بەرىلەتىن ستيپەنديا كولەمى ارتتى. اقىن-جازۋشىلاردىڭ جيناعىن شىعارۋ ءىسى دە مىقتاپ قولعا الىنا باستادى. قالاي دەسەك تە, جامبىلدىق قالامگەرلەر سوڭعى ۋاقىتتا بيلىكتىڭ جىلى كوزقاراسىن سەزىنىپ وتىر.
جاڭا جۋرنالدىڭ اشىلۋى – وڭىردە اتقارىلعان يگى ىستەردىڭ زاڭدى جالعاسى. تاراز – قازاق تاريحىنىڭ تەمىرقازىعى. اۋليەاتا جەرىندە العاشقى قاۋىمدىق وركەنيەتتەن باستاپ, ءار ءداۋىر جادىگەرلەرىن كوپ كەزدەستىرەمىز. ايتكەنمەن, بىزدە تاريحقا تەرەڭ بويلايتىن ماماندار تاپشى ەكەنى راس. سوندىقتان جاڭا جۋرنال ۇجىمى الداعى ۋاقىتتا بىلىكتى زەرتتەۋشىلەرمەن تىزە قوسىپ جۇمىس ىستەپ, وقىرمان ىقىلاسىنا بولەنەدى دەگەن سەنىم زور», دەدى جازۋشى-دراماتۋرگ ەلەن ءالىمجان.
ءىس-شارا سوڭىندا پرەزيدەنت كەڭەسشىسى مالىك وتارباەۆ, قالامگەرلەر ەلەن ءالىمجان, پەرنەباي دۇيسەنبيننىڭ قاتىسۋىمەن جاڭا جۋرنالدىڭ تۇساۋى كەسىلدى. ايىنا ءبىر رەت جارىق كورەتىن جۋرنالدىڭ باس رەداكتورى قىزمەتىنە ارىپتەسىمىز مارجان راقاي كىرىستى.
تاراز